08.03.2020
Гзаф алакьунар ава
Бажарагълуди гьар са карда бажарагълу жеда лугьудайвал, Жульета Омаровадини вич неинки муаллим, шаир, тамада, гьакI манидарвилин алакьунарни авай пешекар тирдини тестикьарнава. И крар кьилиз акъудунилай гъейри, ада мектебдиз фидай яшдив агакь тавунвай кьве рушаз тербия гузва. Хайи чIалалай гъейри, ада вичин веледриз гиламаз урус ва ингилис чIалар чирзава.Жульета 1994-йисан 24-июндиз Кьурагь райондин Моллакент хуьре дидедиз хьана. 2009-йисуз хуьруьн юкьван мектебдин 9-класс тафаватлудаказ акьалтIарна, Дербентдин педучилищеда къецепатан чIалар чирдай факультетда вад йисуз кIелна. 2014-йисуз агалкьунралди училище куьтягьна, Сулейман-Стальский райондин Испикрин хуьре ингилис чIалан тарсар гана. Пуд йисалай гзаф вахтунда ина муаллимвал авур ам 2017-йисуз Моллакент хуьруьн мектебдиз хтана. Алай вахтунда ана гъвечIи классрин ингилис чIалан муаллимвиле кIвалахзава.
КIвалахиз тIимил йисар ятIани, адан тежриба, алакьунар вини дережада ава. Умун къилихар, хъсан чирвилер, алакьунар авай ада коллективдин патай еке гьуьрметни къазанмишнава. Алай йисуз ам “Дагъустандин йисан муаллим-2020” конкурсдин муниципальный паюна гъалиб хьана. Гуьгъуьнлай ада алакьунар конкурсдин зонадин паюнани къалурна.
Ж.Омаровади датIана чирвилер артухарунихъ, яратмишунихъ ялзава. ИкI, кьилин образование къачун патал ам 2018-йисуз ДГПУ-дин къецепатан чIаларин факультетдик экечIна. Алай вахтунда ингилис ва араб чIаларай чирвилер къачузва.
Гьеле мектебда кIелзавай чIавалай хайи чIалал, эдебиятдал рикI алай жегьилди вичин фикирар шииррин цIарариз элкъуьрзава. Ватанперес Жульетади 2018-йисан 3-мартдиз Махачкъалада Кьиблепатан Дагъустандин Жегьилрин Союзди ва ФЛНКА-ди тешкилай “Кьиблепатан Дагъустандин ирс” конкурсда 2-чка кьуна. Ада Махачкъалада Дагъустандин писателрин Союзда кьиле фейи жегьил шаиррин II форумдани иштиракна (2018-й.).
Ж.Омаровадин шиирар “Лезги газетдиз” са шумудра акъатна, ннтернетда кардик квай “Шиирар” сайтда авай адан эсерриз кIелдайбуру хъсан къимет гузва. Ам шаиррин “Лезги булах” кIватIалдин членни я.
Эхиримжи вахтара манидарвилин рекье Жульетади виликди камар къачузва. Манийрин чIаларни кхьизва. ЦIийи манийрилай гъейри, ада халкьдин манийрални чан хкизва, лезги концертар тешкилунин, кьиле тухунин кардик вичин пай кутазва. Къуй мадни агалкьунар хьурай!
Чешме: Лезги Газет
